Frank Nijsten; Crescendo Proficiat

Wie de veurzitter mich vroog om e sjtökske te sjrieve veur 't jubileumbeukske höb ich neet lang mòtte prakkezeere. ‘t lèsjte woo ich aan dach is: ich doon dat in oos Limburgs dialek. Crescendo is ein toneelclub die veural dialeksjtökke sjpeelt en daobie sjrief ich leever in mien mooderstaal es in 't ABN. Zomer 1978. Harie Moonen, de ièsjte regisseur nao de heroprichting van Toneelvereiniging Crescendo kump mich vraoge of ich gein interesse höb om toneel te sjpele.

Onger toezègging dat ich dao waal interesse in haw en ins nao ein repetiesje zou kòmme kieke vertrok hae weer. Nao 't repetiesjebezeuk besjlaot ich om lid te waere.
Nao bienao 25 jaor later mòt ich zègge dat ich gein moment sjpiet gehad höb, dat ich lid gewoore bèn van ‘De Toneelclub’ zoa wie men dat in Siömmert of Siummert zaet. In al die jaore höb ich aan väöl produkties maoge mitdoon. In ‘t begin waor dat veural sjpele, naoderhand ouch grimere en regissere.
E paar jaor nao de heroprichting krege veer 't idee om ouch get veur de jeug te gaon doon. Veer begòste op de zölder baove 't auwt gemeintehoes mit zeve of ach kinger. Veer rippeteerde in 't naojaor en in de kaesjvekantie waore veer eeder daag aan 't oefene.
Mit Driekeuninge woort dan 't sjtök op de planke gebrach veur de kinger van Siömmert. Noe nog weurt dit eeder jaor gedaon. Van die kinger die toen begòs zin, zin ter noe nog väöl lid van oos vereiniging.
Naeve de driekeuningesitökke deit de jeug ouch mit in sketches veur de vastenaoveszitting, in groate aovendvöllende produkties en af en toe ouch in echte jongeresitökke.
Dat is in mien auge de krach van Crescendo. De jeug weurt ouch debie betrokke. ‘Wae de jeug haet, haet de toekoms’, zaet e sjpraekwoord. Ich dènk dan ouch dat Crescendo toekoms haet. Dit mòtte veer blieve doon ummer weer, de jeug debie haole, dan besiteit oos toneelclub euver viefentwintig jaor ouch nog en is 't dan sjus wie noe ’n bleujende vereinging wo väöl luuj lid van wille zin.

Crescendo veuroet nao de volgende 25 jaor

Reserveren

Zodra de kaartverkoop voor onze nieuwe productie start, kunt u hier reserveren.

Facebook

Blijf op de hoogte van het meest recente Crescendo nieuws, volg ons op Facebook.